January 10, 2017 - 12:00am
CEBU, Philippines - Giduslak og buak nga botelya ang usa ka lalaki human nibalibad sa tagay niadtong Domingo pasado alas 9 sa gabii sa Kasadya, Barangay Sta. Cruz, Lungsod sa Ronda.
Patay na nga naabot sa Barili District Hospital si Paul Bolabola, 35, human duslaka og buak nga botelya sa tiyan sa suspek nga si Danilo Rio, 45, parehong molupyo sa nahisgutang lugar.
Usa ka Ruel Bayno nga molupyo sa maong lugar ang personal nga nakapahibawo sa kapolisan sa maong insidente.
Matud ni PO2 Virgilio Villamor sa Ronda Police Station nga samtang nagtagay sa ilimnong makahubog ang suspek, gihagad ang biktima sa pag-inom apan nibalibad.
Giingong gikasuko kini sa suspek hinungdan nga iyang giduslak og buak nga botelya ang biktima.
Kasamtangang nabalhug sa selda sa Ronda Police Station ang suspek kinsa gikatakdang pasakaan og kaso sa korte. - Jomari G. Fernandez (BANAT NEWS)
Linkback:
https://tubagbohol.mikeligalig.com/index.php?topic=84663.0