MikeLigalig.com

Saturday, March 24, 2012


DUNAY nakuhang suicide note nga sinulat sa pinulongang Nihongo gikan sa Hapon nga nakaplagang patay sa bakanteng luna atubangan sa Kingdom Hall of Jehovahs Witness didto sa Diho Subdivision, Barangay Cabantian, Buhangin District, siyudad sa Davao niadtong Biyernes.

Nasayran nga ang tinuod nga pangalan sa biktima mao si Yusuke Osawa Kobayashi, 48, lumad nga taga Yokohama, Japan ug nagpuyo sa #159, Almond Street, Phase 7, Ecoland Subdivision.

Sa imbestigasyon nga gilusad sa Buhangin Police Station, nasayran nga milakaw ang biktima sa iyang balay niadtong Marso 20 ug miadto sa iyang kanhi balay usab didto sa Bacahoa Village, Barangay Cabantian, Buhangin.

Sumala pa nga alas 9:00 sa buntag niadtong Huwebes, nakig-inom ang biktima sa iyang bayaw nga si Jeoffrey Maravillas.

Apan alas 5:00 sa hapon sa maong adlaw, milakaw na sab ang Hapon sa wala masayring lugar.

Pagka-alas 6:00 sa gabii niadtong Huwebes, nakit-an ni Ricardo Plantar ang biktima nga naglakaw padulong sa bakanteng luna atubangan sa simbahan sa Jehovahs Witness didto sa Barangay Cabantian nga mora og wala sa kaugalingon.

Pipila ka minuto ang milabay, nakadungog ang mga molupyo sa maong lugar og usa ka buto sa pusil nga wala usab nila panumbalinga.

Alas 5:00 sa buntag niadtong Biyernes, nakaplagan na lang ang patay'ng lawas sa biktima nga nagbuy-od sa bakanteng luna ug adunay samad pinusilan sa tuong bahin sa ulo.

Nasayran usab nga dunay gitunol nga sulat ang biktima sa kanhi niyang katabang nga si Rowena Moralla nga gihatag usab sa katabang sa ugangan sa biktima nga si Carmelita Maravillas pipila ka minuto una milakaw ang Hapon.

Ang maong sulat giingong mao ang suicide note sa biktima nga gihubad sa iyang asawa nga si Marites Kobayashi.

Ang suicide note naa karon PNP Crime Laboratory aron nga matandi ang pirma sa pasaporte sa biktima. (Blue Cordero)

Gipatik sa mantalaang SuperBalita Davao Marso 25, 2012.



Linkback: https://tubagbohol.mikeligalig.com/index.php?topic=48667.0