Ni Romeo T. Limpangog (Banat) Updated August 09, 2011 12:00 AM
CEBU, Philippines - Nahabwa ang tinai sa usa ka construction worker nga gidunggab sa kauban niya sa trabaho sa sitio Basak Mercado, barangay Basak, dakbayan sa Lapulapu sa miaging buntag.
Ang biktima mao si Brando Mangubat, 28, ulitawo, taga Lapulapu, samtang ang suspek nailhan lang sa ngalang Samuel nga taga dakbayan sa Danao, ug kauban sa biktima sa gitrabahoan niining construction firm sa maong dakbayan.
Si PO2 Carlos Barluado sa homicide section sa kapolisan sa maong dakbayan miingon nga nag-inom pa ang biktima ug ang suspetsado sa usa ka tindahan duol sa ilang gitrabahoan.
Apan dihang nalasbag na, giingong gisekreto og yabo sa yuta ni Mangubat ang iyang tagay hinungdan nga puwerting sukoa sa suspek busa nagharong sila aron magsinumbagay apan gipugngan sila sa mga kauban nila sa trabaho.
Dugang pa ni PO2 Barluado nga mipauli ang suspetsado sa ilang gitrabahoan ug sa pagbalik niini nagdala na og kutsilyo nga maoy gihansak ngadto sa tiyan sa biktima ug nahabwa ang tinai niini.
Gihatod dayon ang biktima ngadto sa Mactan Doctors’ Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.
Padayon pang gipangita sa kapolisan ang suspetsado human kini mosibat human makadunggab. (BANATNEWS)
Linkback:
https://tubagbohol.mikeligalig.com/index.php?topic=42808.0
Topic: Gisekreto og yabo ang ilimnon, giluba sa kainom, tiyan babha tinai habwa (Read 608 times)