Ni KRIS C. SIALANA
NALUBONG ang bala sa tuo nga bahin sa aping sa usa ka lalaki human gipusil sa kauban nga trabahante samtang nangumbira sa ilang agalon niadtong milabay nga gabii sa Poblacion Quezon, Bukidnon.
Kritikal ang kahimtang ni Roberto Puenleona, 30, minyo nga lumulupyo sa Minsalirac, Quezon, Bukidnon human nakaangkon og samad pinusilan sa iyang liog samtang ang suspek nga si Ondoy Rosales, taga San Isidro, Quezon, Bukidnon ug kauban ra usab niini nga trabahante.
Subay sa igsuon sa biktima nga si Cherry Ann nga gi-imbitahan ang iyang igsuon lakip na si Rosales sa ilang agalon kay lage nag-ihaw man kini og baboy.
Giingong sa dihang nalango na sa ilimnong makahubog naglalis ang duha sa wala ikabutyag nga rason ug miresulta sa pagpamusil.
Nakurat na lamang kini sila gumikan kay wala kini magtuo nga nagdala-dala og armas ang nahisgutang suspetsado.
Nakaangkon kini og samad sa iyang liog diin nalubong pa ang bala sa wala matuki nga klase sa armas sa iyang aping sa dihang gidala sa Northern Mindanao Medical Center, dakbayan sa Cagayan de Oro.
Sa pagsulat niini nga balita, ang biktima ang padayon pa nga giobserbahan sa mga mananambal samtang ang suspek ang padayon pa usab nga gipangita sa mga otoridad.
Gipatik sa mantalaang Superbalita Cagayan de Oro Abril 16, 2016.
Linkback:
https://tubagbohol.mikeligalig.com/index.php?topic=82203.0