SuperBalita Cagayan de Oro
Ni Stephanie Viovicente-Berganio
Sunday, November 3, 2013
DEAD on arrival sa Northern Mindanao Medical Center (NMMC) ang usa ka lalaki human kini gipusil sa usa ka babaye nga silingan niini niadtong Sabado mga alas 7:00 sa buntag sa Zone-4, Barangay Bayabas ning siyudad sa Cagayan de Oro.
Si Police Senior Inspector Alfredo Ortiz, hepe sa Police Station 4 (PS4) niila sa biktima nga mao si Ruben Carpio III, 43, nagpuyo sa susamang dapit apan lumad nga taga probinsya sa Camiguin.
Gitumbok nga suspetsado mao si Delma Melante, 41, residente sa susamang dapit.
Sa inisyal nga imbestigasyon, nasuta nga daw daan na nga nagkalalis ang duha tungod kay giingong adunay utang si Carpio ni Melante.
Giingong nagsige og paningil ang suspetsado ngadto sa biktima apan kanunay siya nga balibaran tungod kay daw wala kini ikabayad.
Atol sa insidente namatikdan nga nag-estoryahanay ang duha apan misangpot sa grabeng panaglalis ug kalit lang dayon gipusil ni Melante si Carpio.
Pulos fatal ang tulo ka mga igo ni Carpio sa iyang dughan, ulo ug liog nga maoy hinungdan sa kamatayon. Gisuwayan pa og dala ang biktima sa NMMC apan dead on arrival na kini nga gideklarar sa doctor.
Ang suspetsado nasikop usab dayon sa mga barangay opisyal sa dapit ug karon gibalhog na sa Maharlika Detention Cell.
Nahipos usab sa crime scene ang basyo sa kalibre .38 ug nasuta nga mobalor sa P10 mil ang utang ni Carpio ngadto sa suspek.
Matud ni Ortiz nga desidido ang paryente sa biktima nga pasakaan og kasong murder ang suspetsado tungod kay daw gamay ra kaayo nga rason ang utang nga gikalas ang kinabuhi niini.
Samtang migawas usab ang taho nga usa sa gikaulitan sa suspek tungod kay daghan kini kaayo og estorya batok kaniya imbes mao pay nakautang daw kaniya.
Linkback:
https://tubagbohol.mikeligalig.com/index.php?topic=76552.0
Topic: Gipusil sa babaye ang utangan nga lalaki, igo sa dughan, ulo ug liog, patay (Read 855 times)