Ni Stephanie Viovicente-Berganio
Wednesday, February 25, 2015
ABO na nga naabtan sa ginikanan ang ilang lima ka mga anak human nasunog ang ilang balay niadtong Domingo sa Sitio Punuon, Barangay Lambangan, lungsod sa Cabanglasan, probinsya sa Bukidnon.
Ang mga biktima nag-edad og 1, 3, 5, 10 ug 11 anyos kinsa pulos wala nay kinabuhi ug napaig na nga naabtan sa ginikanan nga mao sila si Richie ug Anabel Linguyan, pulos hingkod ang edad.
Sa inisyal nga imbestigasyon sa Cabanglasan Municipal Fire Station, nasuta nga posibleng ang solar lamp nga anaa sa kusina nga bahin maoy hinungdan sa sunog apan padayon pa nga giimbestigahan ning panahona.
Ang kinamagulangan nga igsuon nga giilang si Angelo, 12, miingon nga milakaw ang ilang mga ginikanan niadtong tungora ug sila lamang ang nahibilin sa balay.
Gani, iya na nga gilutoan og panihapon ang iyang mga igsuon ug gibahogan na usab niya ang ilang binuhing baboy ug mibiya sa puloy-anan tungod kay iyang giapas ang iyang inahan ug amahan nga anaa sa sentro. Giingong ang sentro adunay tulo ka kilometro ang kalay-on gikan sa puloy-anan ug motabok pa sa sapa.
Dihang gihinabi sa usa ka telebisyon ang inahan sa mga bata, niingon kini nga labihan ang iyang pagbasol sa maong hitabo.
"Kong niingon pa ang Ginoo nga dili ko molakaw adtong adlaw kay dunay mahitabo dili jud nako biyaan akong mga anak," butyag niini.
Linkback:
https://tubagbohol.mikeligalig.com/index.php?topic=79575.0