MikeLigalig.com

Ni DOMILYN R. PICO


DAVAO DEL NORTE -- Midangop sa Tagum City Police Station ang usa ka 19-anyos nga babaye human giingong gikulata ug gihasi sa inahan sulod sa merkado sa dakbayan sa Tagum kagahapon, Sabado, alas 11 sa buntag.

Puno pa sa kahadlok ang anak nga si Melay (tinuod nga ngalan gitago), estudyante sa kolehiyo dihang nag-atubang sa iyang inahan nga si Susan (di tinuod nga ngalan) human siya matud pa gikulata niini kay nasakpan nga uban sa iyang uyab.

"Dili, Ma, kabalo ko nga kung wala pa ang mga pulis dinhi karon, imo na sad ko nga gikulata," sulti ni Melay sa iyang inahan.

Nasayran nga taga Cotabato City ang mag-inahan, apan anak mikagiw sa Tagum ug mipuyo mismo sa balay sa uyab niini nga si Harold, estudyante sa kolehiyo.

Sumala pa nga duna'y tindahan ang inahan ni Harold sa merkado nga si Mary sa dihang miabot matud pa ang inahan ni Melay ug gipanglabay ang ilang mga paninda.

Nahibaloan nga nagkasabot na si Harold ug Melay nga mag-ipon na lamang ug magtinabangay hangtud makalampos.

"Dili nako mosugot nga mokuyog pa siya sa iyang mama. Bun-ugon ra na siya. Andam ko makigminyo niya," sulti ni Harold sa Superbalita dihang nahinabi kagahapon.

Si Harold naghulat gawas sa Investigation Office sa Tagum City Police samtang gihusay sa sulod ang mag-inahan.

Nasayran nga si Melay nakaangkon og bun-og sa likod ug wala nga bahin sa paa hangtud tiil human giingong nakulatahan sa inahan.

Samtang tibuok pamilya ni Harold ang miabot sab sa presinto aron nga suportahan si Melay.

"Kabalo naman mi pareho ana iyang mama nga uyab ang among mga anak. Wala nako na gikunsinti. Ako pa gani ang ga-advice sa iyang anak nga mouli," sulti sa inahan ni Harold nga si Mary.

Matod pa nga andam ang pamilya ni Harold nga i-minyo na lamang ang duha.

Nasayran sa Superbalita nga supak ang inahan ni Melay kang Harold gumikan kay managlahi ang ilang relihiyon.

Sumala pa nga ang relihiyon ni Melay usa ka Jehova samtang si Harold, Katoliko.

Sa pagdumili ni Melay nga mokuyog sa inahan, mibahad si Susan, "Dili nako kaya, Nak, nga mag-alaga ko sa imong mga anak unya ikaw naa dinhi. Dili ka mouli tungod lang kay namali ko nimo kaisa ug nakulatahan ta ka. Kung mao na, mabuak na lang gyud ning atong pamilya."

Wala pa masayri kon unsay gidangatan sa paghusay sa mga pulis gumikan kay alas 2 na sa hapon wala pa mahuman ang paglantugi sa mag-inahan.


Gipatik sa mantalaang SuperBalita Davao Hunyo 21, 2015.

Linkback: https://tubagbohol.mikeligalig.com/index.php?topic=80252.0