Ni KRIS C. SIALANA
GIHIMAKAK sa ulitawo ang alegasiyon kalabot sa pagpangawat og saging nga mokabat sa 50 ka kilo niadtong Martes mga alas 3:30 sa hapon sa Cogon Market, dakbayan sa Cagayan de Oro.
Ang nagpatala naila nga si Gloria Menisteryo, 60, minyo ug residente sa Bueno Oro, Macasandig ning dakbayan samtang ang suspek si Jimboy Ello, 19, ulitawo nga taga Mambatangan, Manolo Fortich, Bukidnon ug kasamtangang nanimuyo sa Justo-Ramonal, Barangay 32.
Sa nahipos nga report gikan sa Police Station 2 (PS2) sa Cogon, nasayran nga nagpatala si Menisteryo sa kapolisan human nga nasapon niya sa akto ang suspek nga gihakot ang saging nga lakatan niya hinungdan nga gisikop kini sa mga anaa sa maong dapit ug gidala sa presinto.
Samtang sa pakighinabi sa Sun.Star SuperBalita, gipanghimakak ni Ello ang alegasiyon ug giingong wala kini kasayoran nganong gipasanginlan.
“Igo lang man ko nag-internet dayon gidakop lang dayon ko, gipasanginlan ra ko gaingon pa gale sila nga nagbahad pa daw ko nga dunggabon nako sila bisan wala gayud na nako gibuhat,†ang hugtanong paghimakak sa suspek.
Gidugang pa niini nga nakurat na lamang kini ug gani gitabangan pa og kulata sa mga nagdakop kaniya.
Sa pagsulat niini nga balita, ang insidente ang nakatala sa buhatan sa kapolisan sa PS2.
Gipatik sa mantalaang Superbalita Cagayan de Oro Hunyo 02, 2016.
Linkback:
https://tubagbohol.mikeligalig.com/index.php?topic=82331.0