Rotaplast nagtanyag og surgery sa bungi
SuperBalita Cebu » Balita
Saturday, September 27, 2014
LABING minos 100 ka mga tawo nga bungi nga kadaghanan mga bata ang ipaubos sa libreng operasyon sa Rotary Plastic Surgery (Rotaplast).
Si Romeo Toledo, presidente sa Rotary Club of Cebu Port Center, nidasig sa mga tawo nga dunay kakulian sa baba nga mopahimulos sa libre nga medical mission nga himuon sugod Oktubre 9-16 sa Adventist Hospital Cebu (kanhi Miller Hospital) sa Tres de Abril, dakbayan sa Sugbo.
Matod niya pulos mga langyaw nga doktor nga kasagaran mga inila nga surgeon sa Estados Unidos ang moopera.
Siya niingon nga dunay lisensiya ang maong mga doktor nga moopera dinhi sa Pilipinas.
Tumong sa mission nga maminosan ang gidaghanon sa mga tawong bungi labi na ang mga bata nga gibugalbugalan sa ilang eskwelahan.
Sa nangaging 11 ka mga mission sa Rotaplast, 1,000 na ka mga bungi ang na-operahan ug nagpuyo og normal nga kinabuhi.
“Dako kaayo ang kausaban labi na kanang mga bata nga kadaghanan ana nila gi-bully sa school, gibugalbugalan, karon wala na gyud,†nagkanayon si Toledo atol sa 888 News Forum sa Marco Polo Plaza niadtong Martes.
Iyang gidasig ang mga bungi nga gusto mopahimulos sa libreng operasyon nga magpa-check up daan karong Oktubre 8 sugod alas 6:30 sa buntag hangtod alas 12 sa udto sa Adventist Hospital.
Sa nilabay nga mga medical operation, sa Vicente Sotto Memorial Medical Center gihimo ang operasyon.
Apan tungod kay wala nay magamit nga lugar sa VSMMC human naguba sa niaging kusog nga linog niadtong Oktubre sa nilabay nga tuig, ang Rotaplast nakigtambayayong sa Adventist Hospital.
Si Toledo nagkanayon nga kadaghanan sa mga bungi kay mga kabus ug base sa ilang statistics kasagaran gikan sa Bantayan Island.
Linkback:
https://tubagbohol.mikeligalig.com/index.php?topic=79032.0
Topic: Gidasig ang adunay kakulian sa baba nga mopahimulos sa libreng operasyon (Read 611 times)