Ni KRIS C. SIALANA
GIPUSIL sa mga tulisan ang lechonero ug usab kahero sa lechonan human matunol ang kita sa patigayon niadtong Huwebes mga alas 9:20 sa gabii sa Valenzuela Street, Barangay Lapasan, dakbayan sa Cagayan de Oro.
Nagpaalim sa Northern Mindanao Medical Center (NMMC) ning dakbayan si Dulfo Asna, 29, minyo, taga Mambato, Lapasan, Agora ning dakbayan.
Sa nahipos nga report gikan sa buhatan sa kapolisan sa Police Station 3 (PS3) sa Agora sa pagpangulo ni Police Chief Inspector Ariel Philip Pontillas, nasuta nga kalit lamang nga niabot ang duha ka mga suspetsado sakay sa motorsiklo nga kolor pula, wizard type ug mihunong mismo sa atubangan sa maong patigayon.
Giingong gihatag na sa biktima ang halin sa establistamento nga mokabat sa P3,700 apan gipusil pa gihapon kini ginamit ang gitoohang .38 revolver.
Ang usa sa mga suspetsado giingong tambukon ang panglawas ug pikuton ang mata kinsa maoy mipusil sa biktima samtang ang drayber nga nagsul-ob og helmet ang nagsilbing look-out.
Nakaangkon og samad pinusilan sa ubos nga bahin sa ilok ang biktima hinungdan nga dali kining gidala sa NMMC.
Sa pagkakaron, padayon pa ang imbestigasiyon sa kapolisan ug hot pursuit operation sa operatiba sa PS3 sa mga suspetsado nga mitulis ug miluthang sa biktima.
Samtang nagpaalim pa sa NMMC si Asna.
Gipatik sa mantalaang Superbalita Cagayan de Oro Agosto 06, 2016.
Linkback:
https://tubagbohol.mikeligalig.com/index.php?topic=82628.0