Ni Guam P. Logroño
Friday, April 5, 2013
POLICE official nipusil patay sa uyab sa iyang anak nga giingong mosukol ug mopusil unta kaniya dihang iyang naabtan kagahapon sa alas 3 sa hapon sa usa ka payag sulod sa Don Catarata Memorial National High School sa Barangay Guadalupe, dakbayan sa Bogo.
Si Chief Insp. Ceferino Tabay Jr., deputy police chief sa Bogo City Police Station, naunay pagbalhog sa karsel sa Bogo Police Station human iyang napatay si Vincent Paul Montesclaros, 17, nagpuyo sa nahisgutang barangay, 1st year college sa Northern Cebu College sa dakbayan sa Bogo.
Si Monteslaros uyab sa 16-anyos nga anak anak ni Tabay ug bag-uhay lang migradwar sa sa Saint Louise High School sa dakbayan sa Bogo.
Si Supt. Anthony Bagarinao, hepe sa Bogo Police Station nga nahinabi sa Sun.Star Superbalita, nagkanayon nga si Montesclaros gideklarar nga dead-on-arrival (DOA) sa Cebu Provincial Hospital sa dakbayan sa Bogo tungod sa samad pinusilan sa ulo ug dughan.
Matod ni Bagarinao nga duty si Tabay atol sa krimen.
Nipauli kini makadiyot sa ilang balay aron mokaon, apan miapas sa iyang anak nga didto sa tunghaang pampubliko sa high school, 150 metros ang gilay-on gikan sa ilang balay.
Si Tabay nibutyag kaniya nga sa pag-abot niya sa maong dapit iyang naabtan sa sulod sa payag sa ekwelahan nga nagkadugo ang iyang anak nga babaye.
Ang biktima gikatahong mobunot unta sa iyang armas aron unta siya pusilon hinungdan nga iyang giunhan sa paggpusil.
Human niini, si Tabay nanawag og back-up ug ilang gidala sa tambalanan ang biktima apan dead on arrival kini.
Linkback:
https://tubagbohol.mikeligalig.com/index.php?topic=71761.0