MikeLigalig.com

Ni HERTY B. LOPEZ


AMAHAN ug ang iyang anak nga babaye nga nagmotorsiklo nangamatay dihang sila nabangga sa usa ka van nga gimaneho sa usa ka Chinese national sa lungsod sa Balamban niadtong Biyernes sa hapon.

Nadala pa sa Balamban District Hospital sila si Danny Bolongaita, 46 ug si Mary Joy Bolongaita, 12, apan pipila ka oras ang nakalabay, nakabsan sa ilang kinabuhi.

Alas 2 sa hapon dihang nahitabo ang aksidente sa national highway sa Sitio Tunga, Brgy. Cantuod, nga didto usab nagpuyo ang mga biktima.

Ang chief traffic investigator sa Balamban Police nga si SPO1 Rolando Navarro nga nahinabi sa Sun.Star Superbalita nibutyag nga paingon sa Asturias sila si Bolongaita samtang ang van paingon sa Balamban.

Dugang niya nga nakaligis og saag nga iro ang gi­sakyan nga motorsiklo (GD 56877) sa mag-amahan mao nga nawagtangan og kontrol si Danny.

Nibangga sila sa Isuzu Forward wing van (JFD 347) nga gimaneho ni Conghai Zhu, 38, residente sa Poblacion, siyudad sa Carcar.
Alas 4:30 sa hapon sa samang adlaw dihang u­nang nakabsan sa kinabuhi si Mary Joy, kinsa naka­angkon og samad sa iyang ulo.
Alas 6 sa gabii usab namatay si Danny, kinsa nakaangkon og nagkadaiyang mga samad sa lawas.

Gihulagway ni Navarro nga pwerteng gubaa sa atubangan sa van tungod sa impact sa motorsiklo.

Dali nga gitanggong si Zhu sa prisohan sa traffic, apan pasado alas 10 sa gabii sa samang adlaw dihang nakagawas human mi-file ang asawa sa biktima og affidavit of desistance.

Matod ni Navarro nga ang asawa na sa biktima ug si Zhu nagsabot.

Tungod sa maong affidavit wa na sila’y mahimo, ilang gi-release ang driver.


Gipatik sa mantalaang SuperBalita Cebu Nobiembre 29, 2015.

Linkback: https://tubagbohol.mikeligalig.com/index.php?topic=81506.0