Ni Lesley Caminade-Vestil (Banat) Updated April 24, 2011 12:00 AM
CEBU, Philippines - Duha ka mga lalaking nagtinga na nga gisulod sa sako ug may daghang samad tinigbasan sa kalawasan ang napalgan sa mga molupyo pasado alas-8 sa gabii niadtong Miyerkules Santo sa sitio Tupas barangay Taptap ning dakbayan.
Giila ang duha nga sila si Glenn Perez Parawan, 32, ug Manuel Edgardo Yray Parawan, pulos molupyo sa barangay Maslog siyudad sa Danao. Adunay pagdudang biktima sila sa salvage.
Ang mga biktima kagahapon sa buntag pa mailhi pinaagi sa igsuon ni Glenn nga si Niña Jenny dihang ang naulahi giingong gisultihan sa usa ka giila lang nga Gummy kabahin sa nahitabo kanila.
Sa imbestigasyon sa kapolisan nasayran nga ang impormanteng si Jennifer Bonghanoy bag-ohay nga naabot sa ilang panimalay uban sa iyang 6-anyos nga anak dihang nakadungog siya og sampit sa tawo.
Matud pa niini ngadto sa mga imbestigador sa Homicide Section ang nanampit og tabang susama og tingog sa tawong nag-agulo nga “part tabang, part tabang†dili layo sa iyang balay.
Tungod kay gabii naman ug ngitngit ang lugar diin magagikan ang nanampit dali siyang nangayo og tabang sa iyang silingan nga si Danny Bontuyan.
Dihang ilang giadto ang dapit diin magagikan ang tingog gibana-banang 40 metros gikan sa iyang balay nakugang sila nga dunay duha ka sakong adunay sulod nga nagkadugo.
Tungod niini dali silang mitawag sa barangay nga diin madestino si SPO1 Jodito Llena ug kaubanan isip detailed police kinsa dali usab nga miresponde.
Ang kapolisan mao nay daling miabli sa maong mga sako ug diha pa nila mahibaw-ing mga tawo kini nga nabulit og samad tinigbasan sa kalawasan ug wala nay kinabuhi.
Pagresponde sa Emergency Rescue Unit Foundation, ila dayun nga gitabang ang duruha apan patay na ang duha.
Sa pakisusi sa Crime Scene Investigation Unit (CSIU) sa lawas sa mga biktima ilang nasuta nga si Glenn nakaangkon og samad tinigbasan sa tangkugo ug sa likod nga bahin sa iyang ulo diin ang liog usab niini adunay higot nga packaging tape.
Samtang si Edgardo nakaangkon usab og samad tinigbasan sa nawong dapit sa iyang baba, ug aduna usab kini higot nga packaging tape sa iyang liog lakip na ang iyang kamot.
Ang patay’ng lawas sa biktima gidala sa Saint Francis Funeral Homes aron sa ipahigayon nga awtopsiya. (EIM) (BANAT NEWS)
Linkback:
https://tubagbohol.mikeligalig.com/index.php?topic=40364.0
Topic: 2 gisulod sa sako gitagod-tagod (Read 863 times)