Ni EDGAR FUERZAS
KABACAN, North Cotabato -- Patay ang usa ka lalaki nga giingong kabit samtang samdan sab ang babaye human gipamusil ni mister nga pulis, alas 10:05 sa gabii niadtong Lunes.
Giila ang nakabsan sa kinabuhi nga mao si Loloy Sumalpong Bel, 34, samtang samdan si Cherry (bansagon gitago sa Superbalita), 36, mga molupyo sa Barangay Poblacion, Kabacan.
Si Kabacan municipal chief of police, Chief Inspector Ronnie Cordero, nagsulti nga nanuroy ang mga biktima sa kanto Roxas ug Mantawil Street sa dihang nakit-an sa bana sa babaye.
Kalit silang gipamusil sa suspek nga dunay ranggo nga Police Officer (PO) 2 gamit ang 9mm pistol.
Patay si Bel nga nakaangkon og samad pinusilan sa ulo, dughan ug likod sa lawas samtang kritikal sab si Cherry nga dunay igo sa dughan ug nawong nga nadala dayon sa mga nagrespondeng pulis sa Kabacan Medical Specialist Hospital.
Tungod kay grabe ang kahimtang, daling gibalhin ang biktima sa Cotabato Provincial Hospital.
Ang suspek gilayong misibat sakay sa iyang motorsiklo human sa hitabo.
Ang pulis maoy bana sa biktima nga si Cherry kinsa giingong dunay relasyon sa napatay nga si Bel.
Samtang gikalap kining balita, padayong gipangita sa kapulisan ang suspek nga gitakdang idemanda sa kasong pagpatay sa korte.
Gipatik sa mantalaang SuperBalita Davao Desiembre 09, 2015.
Linkback:
https://tubagbohol.mikeligalig.com/index.php?topic=81551.0