KIDAPAWAN CITY -- Patay na nga nakaplagan ang usa ka mag-uuma human naghikog sa alas 6:20 sa buntag niadtong Miyerkules.
Giila ang biktima nga mao si Erward Cedenio, 37, minyo, ug molupyo sa Barangay North Manuangan, Pigcawayan, North Cotabato.
Matud ni Pigcawayan Municipal Chief of Police Donald Cabigas nga misinggit og pakitabang ang duha ka menor de edad nga anak sa biktima sa diha nga ilang nakit-an nga nagbitay na ang ilang amahan sulod sa ilang kuwarto gamit ang pisi sa kabaw nga maoy gihigot sa liog.
Gidali siya og tabang sa mga silingan ug gihatud ngadto sa Pigcawayan District Hospital apan gideklara siya nga dead on arrival.
Nasayran nga una naghikog ang biktima, namatikdan siya sa ilang mga silingan nga subo kaayo. Usahay sab magsulti nga siya rang usa didto sa iyang uma.
Daghan ang nagtuo nga wala na maka-antus si Cedenio sa iyang problema ilabi na nga gibiyaan siya sa iyang asawa gumikan sa personal nga problema sa ilang pamilya, hinungdan nga gikutlo ang iyang kinabuhi.
Kapulisan sa Pigcawayan Municipal Police Station padayon nga nag-imbestiga aron maseguro nga walay foul play sa kamatayon sa mag-uuma. (Edgar E. Fuerzas)
Gipatik sa mantalaang SuperBalita Davao Agosto 28, 2015.
Linkback:
https://tubagbohol.mikeligalig.com/index.php?topic=80846.0