Sinulat ni M. O. LigaligHalok ba diay ang makahupay sa kangutngot
nga gibati ning kahiladman karon?
Halok ba diay ang makatangtang sa tunok
nga mitaroy sa kinauyokan ning dughan?
Halok ba diay ang makaibot sa punyal
nga mitusok ning nagdugong kasing-kasing?
Dili halok, dili halok, dili…
Wala mo ako hisabti…
Wala mo hisabti ang matag tulo sa akong luha
nga nahulog sa imong abaga,
mihumod sa imong liog, mibasa sa imong buhok,
mga luha nga way puas ang pagbaha
samtang gigakos ko ikaw sa kataposang higayon.
Wala mo hisabti kining mga luha.
Wala mo hisabti…
Ug imong gihagkan ang akong agtang -
Dili ang akong aping
Dili ang akong mga ngabil
Imong gihagkan ang akong agtang
Ug alang kanimo, igo na kadto nga tambal
sa samad sa atong panaglagyo.
Bisan pa ug imong hagkan ang matag luha
nga matagak ning mga mata,
bisan pa ug imo akong hagkan sa makadaghan,
dili lang sa agtang, dili lang sa aping,
dili lang sa mga mata, dili sa mga ngabil -
dili ako mohunong sa pagbakho
hangtud nga mahubsan ako sa mga luha…
Linkback:
https://tubagbohol.mikeligalig.com/index.php?topic=3637.0