Samtang Ikaw Nahikatulogsinulat ni m. ligaligGisapnay ang atong mga lawas
niadtong mga balili
sa nataran sa balay - ang tulay
sa daklit natong pag-inilhanay.
Naligo ta sa kahayag sa bulan
samtang atong gigakos
ang kataposang kangitngit
sa atong panag-uban.
Mitambid kanato ang katugnaw -
misuhop ang kabugnaw
lapos sa atong kaunoran
nga hapit mahubsan sa kainit.
Naglupad ang akong mga mata
nagpaabot nga mahukasan
ang sayal sa kadlawon -
kadlawon nga nahimong samad.
Buot ko ikaw pukawon
aron magdungan ta ug halok
sa ngabil sa bulan
ug aping sa mga balili.
Apan ang imong mga mata
nahikalimot sa syagit
sa kagabhion - sa singgit
sa malinawong langit.
Nganong nahikatulog ka
samtang ako nagping-it
sa kasakit sa panamilit
sa bulan ug mga balili?
Linkback:
https://tubagbohol.mikeligalig.com/index.php?topic=4602.0