Kung Sud-ong Ko Man Ikawsinulat ni m. ligaligkung sud-ongon ko man ikaw
piyongon ko akong mga mata
aron dili ako matusok
sa kasulaw sa imong pagtan-aw,
motago ang akong kalimutaw
sa hagdanan sa akong kilay
ug akong pilok moluklok
sa suok sa akong tilaok
kay wala na akoy masulti,
wala na akoy mabati
nga huni nga moalisngaw
sa akong kasingkasing
sa higayong makita ko ikaw
kung sud-ongon ko man ikaw
magtalikod lang ko
sa nagbansiwag mong hulagway
aron dili magisi ang samad
sa imong pagsalikway kanako,
aron dili matabas ang uwat
nga handumanan sa imong pagbiya,
ug aron dili na maukay
ang wala pa malubong
nga apdo sa kapait ug kasakit
sa nadubok tang kagahapon
kung sud-ongon ko man ikaw
dinhi lang ko sa halayo
sa imong nahimutangan -
magdungo, magbakho, magtikoko -
mamasin nga imong madamgohan
inig kahigmata mo ning kalibotan,
ang kalibotan nga nalubngan
sa sugilanong wala masugdi
apan gihandom ang kataposan
kung sud-ongon ko man ikaw
wala kay mabating tingog
gikan sa bintana ning mga mata -
dili ko sangpiton imong pangalan,
dili ko ihunghong imong apelyido,
dili ko ihagawhaw imong dagnay -
wala... wala... wala... wala...
wala kay madungog nga dahunog
gikan sa nadunot kong mga bukog
Linkback:
https://tubagbohol.mikeligalig.com/index.php?topic=6528.0