Gitagik ni Mike LigaligAsa na kadtong mga aninipot
nga mangatagak sa akong mga mata
matag sud-ong ko kanila
panahon sa mamingawng kagabhion,
mga aninipot nga dili maihap,
tanan naghagwa-hagwa sa lingganay
sa mga bulak daplin sa kalsada
atbang sa kabos namong panimalay.
Kaniadto daghan ang mohunong
tungod sa balay gikan sa pagbaklay,
mahinangop sa kaanindot sa mga aninipot
bugtong nagkidlap sa naglagitum
nga kangitngit - kauban mga bituon.
Sauna maglingkod lang ko sa lantay,
magsandig sa kahoy nga mahogany,
magsud-ong sa mga aninipot -
ang uban kanila motugdon
sa akong palad nga gibukhad,
unya sa ilang paglupad balik sa bulak
binlan ko nila ug kahumot sa kahayag.
Moabot ang lawom nga kagabhion,
padayon ang pagsud-ong sa mga aninipot,
malimot ko sa katulogon
kay mga aninipot naghatod kanako
ug mga pangutana - langit lang nasayod.
Karon sa akong pagbalik sa balay,
magpalabay sa kagabhion sa lantay,
nangita ko sa mga aninipot;
gihandum ko ang ilang mga pako
diin misakay ang akong handurawan.
Asa na ang mga aninipot?
Asa na ang mga aninipot?
Nganong ilang gitalikdan
ang nangalawos nga kabulakan?
Linkback:
https://tubagbohol.mikeligalig.com/index.php?topic=3077.0