“Isiri!†misikmat kadtong sundalo nga naghinis sa pusil. “Abi wala na man siya makatilaw og linat-oban, abi kanunay nang puno ang iyang tungol dinhi, tahom na kuno kaayo kining dapita nga bisan unsaon pagtan-aw naputos man kining Lipata sa mahait nga mga panas ug mga magay nga makatunok.â€
Nabalda ang ilang panagtabi sa pag-abot sa tulo ka boluntaryo nga nagbaguod pagbitbit sa mga bukag. Mao usay pagkahuman sa nagtupihanay; ang liog ug abaga sa gitupihan gipaspasan sa linaksing bunot sa nagtupi. Gihabwa sa sundalo nga nanugon og tinustos ang mga pagkaon gikan sa bukag. Wala madugay, namuk-ong sila alirong sa gilaray nga mga pagkaon.
Si Malta, nga sa pagsugod og pangaon sa mga sundalo, mitindog ug misandig sa punoan sa lubi, nakasud-ong pag-ayo sa nagkalainlaing matang sa pagkaon. Dinhay kan-ong sungohon, dinhay timgas kaayong pagkabugas, dinhay binuyokan og mayok. May tapol, may masyaw, may puti. Ang sud-an nagkalidades usab. Dinhay utan nga pulos kamunggay ug walay subak, dinhay inun-onang kasag ug tamala, dinhay duha ka gulot nga gisadong manok, dinhay kinhason saang ug aninikad, dinhay itlog nga tinortilyas ug linapwaan, dinhay inadlip ug ginisal nga mga talong ug paliya, dinhay utan nga sinubakan og tinap-anang bansikol, dinhay tinuwa nga danggit ug kitong.
“Ikaw, Berto,†matod sa sundalo nga manunupi, “nanabi ka mang dato sa inyo sa Argaw, wala ka pa makatilaw og pagkaon nga ingon niini kadaghan og klase.â€
“Ayaw dihag saba, Brad,†nagkanguhal kadtong ginganlag Berto tungod sa kadako sa iyang nahungit.
Ulahing mitambong ang sarhento. Wala siya motipon sa iyang mga sakop. Ang kan-ong humay dinha ipahimutang sa iyang gihigdaan kaganina, ug usa ka sundalo maoy tighatag kaniya sa mga sud-an. Samtang ang mga ultimo nagkinamot, ang ilang dako-dako naggamit og kutsara. Maglain gayod ang pangulo, sa hunahuna ni Malta.
“Mangaon ta ninyo,†mikilo ang sarhento sa tulo ka boluntaryo ug milingi ngadto kang Malta. “Kaon diri, Nang.â€
“Salamat, human na mi,†nagdungan ang tulo ka manghahatod ug mao usab unta ang ibungat ni Malta, apan wala makapadayon.
Linkback:
https://tubagbohol.mikeligalig.com/index.php?topic=39735.0