Pugsanay nga ROTC sa college gitinguhang ibalik
Saturday, August 7, 2010 NAKADAWAT og suporta gikan sa iyang kaubanan sa Ubos Bay Balaoranan ang balaudnon ni Kongresista Eduardo R. Gullas sa unang distrito nga magpabalik sa mandatory Reserve Officer Training Corps (ROTC) sa mga tinun-an sa kolihiyo.
Sila si House Speaker Feliciano Belmonte Jr. ug duha ka mga Deputy Speakers Pablo F. Garcia ug Raul Daza nipadayag nga mo–co-author sa House Bill (HB) 737.
Ang HB 737 nagtinguha sa pagpabalik sa mandatory ROTC sa tanang mga lalaking tinun-an sa pribado ug publikong mga kolihiyo ug unibersidad ug ubang susamang learning institutions.
Ang balaudnon ni Gullas naglatid nga ang ROTC, usa ka programa nga gipadagan sa Armed Forces of the Philippines, magtudlo og patriotism ug paghigugma sa nasod sa mga batan-ong tinun-an.
Gisuportahan sa Department of National Defense ang maong balaudnon tungod kay makatudlo kini og disiplina ug makapalig-on sa military force sa nasod.
Niadtong 2002, giwagtang ang ROTC tungod sa daghang reklamo sa mga tinun-an sa pagpangilkil, pagpang-harass u gang kamatayon sa usa ka tinun-an sa University of Santo Tomas nga si Mark Chua tungod sa giingong hazing sa ROTC. (VLM)
Gipatik sa mantalaang Sun.Star Superbalita Cebu sa Agosto 8, 2010.Linkback:
https://tubagbohol.mikeligalig.com/index.php?topic=31110.0