Rosenda
sinulat ni Satur Apoyon
Kausa ug mao lang kadto nga higayon
Ikaw mikunsad kanako usa ka ting-init kanhi
Apan ngano bang wa dayon ako makasabot
Nga ikaw diay naghalad na unta sa gugma mo
Sa duyanan sa talagsaong yugto sa panaghibalag ta?
Sa dihang mitigsapong na ako sa kalinghod
Diha pa ako makaamgo sa dakoang kahinugon
Sa napasagdang kopa sa paghigugma
Nga diha na unta sa ngilit sa pagpahimulos
Sahi sa atong pagpangaligo sa baybayon sa Punta Cruz.
Dili lang makausa kondili makadaghan gayod
Gisulayan ko ang pagbanhaw sa maong kahigayonan
Pinaagi sa pagbugtaw sa imong mga tunob
Apan bisan giunsa ko na lang ikaw pagsuhid
Namino gayod ako sa napadparan mong lapyahan.
Rosenda, ikaw ang rosas nga nalarag;
Ikaw usab ang bituon nga naawop ug balak nga nahanaw
Sa usa ka panahon nga dili ug dili na gayod mobalik
Bisan pag hulaton ko ang tanang mga banagbanag
Sa nanghiblin kong mga Adlaw sa maas kong kinabuhi.
Maulaw unta ako moangkon, Rosenda
Nga niining gabii sa akong paghandom kanimo
Nagdanguyngoy ako sa tumang kamingaw ug kawili
Sa nayabong dugamis nga gidulot na unta
Usa niana ka anib sa halandomon natong kagahapon.
Linkback:
https://tubagbohol.mikeligalig.com/index.php?topic=54610.0