Sama sa gabii nga miagi, gipayungyong ko gihapon ang akong kalo ug lahi sa akong pagtuo may mga matang mapangutan-ong misagnunot kanako. Gisenyasan ako ni Fe nga nag-akbo sa tamboanan, sa pagpasaka. Sa walay pag-usik og diyotayng tipik sa gutling, gituman ko ang sugo.
Si bisan kinsa malimot nga nagdagan diay ang takna kon anaa sa atubangan sa iyang manulunda. Nalimot ako nga, gawas kang Fe, ang sulod-balay nanghimaraot kanako. Nagbanos-banos kami pagsumbong sa nahitabo kanamo sulod sa duha ka tuig.
—Abi nimo, Raul, daghang nagsugyot kanako labi na ang mga katabang ni Max, sa pagpabulag kanimo. Unsa kunoy mapaabot ko nimo? Matod pa gayod niya ay: kabuang bayang babayhana nga mibulag kang Max nga unta kini, dakog yuta, daghag kalubihan ug hangtod sa bisan kanus-a dili makaila og litohon.
Linkback:
https://tubagbohol.mikeligalig.com/index.php?topic=72477.0