contributor: Dyanitor
(Génawah '07)
Kuwarto ni lola
May giamag na arinola
Banyo ni mama
Gibubuan sa arinola
Sa atabay midagayday
Sa kanal mikatay
Angso...
Ang angso dunay tiil nga laagan
Nagsubay - subay sa mga dalan
Padulong sa sikbit nga gingharian
Ug mialingasaw sa kapupud-an...
Ang angso dunay maidlot nga kamot
Nagagunit ug bolpen nga maanindot
Tinta nga dugo sa papel mibuslot
Mipakgang sa kaugmaon sa mga alaot...
Ang angso dunay baba nga maaghop
Mopahiyom lang kung suod ang masayop
Apan kung ubos niyang mga sakop
Iyang pulong makaon pa'y tahop...
Ang angso dunay mata nga nagpahiyom
Apan kung motutok daw hait nga dagom
Kansang kabangis sa unod motidlum
Daw bitok nga mokutkot sa tiyan nga gigutom...
Ang angso dunay ilong gipanuhot
Kansang panimhot puro lang gyud sa humot
Apan kung si Kulot gani ang mangutot
Okay ra gyud pildi lang ang maglagot...
Ang angso but-an ug panagway
Daw nating karnero sa adlaw'ng igpapahulay
Apan likod sa takuban usa ka lobo nga naglaway
Motukobay diay sa biktima ang panulay...
Ang angso gamhanan ning katilingban
Tagdumala daw hari sa gingharian
Sa mga binuhat nga walay kapilian
Gawas sa pagtulon sa laway sa kapildihan...
Ang anso sikat nga pangalan
Nahipatik sa angso nga pahulayanan
Kuyog ang uban pang anso nga pangalan
Sa kasingkasing ning angso nga kalibutan.
Linkback:
https://tubagbohol.mikeligalig.com/index.php?topic=72553.0